حوزہ نیوز ایجنسی کی رپورٹ کے مطابق، بین الاقوامی یومِ حضرت علی اصغرؑ اور ماہِ محرم الحرام کی مناسبت سے ضلع بڈگام کے ماگام علاقے میں مذہبی عقیدت، خدمتِ خلق اور شہدائے کربلا کی یاد میں مختلف پروگراموں کا انعقاد کیا گیا۔ اس موقع پر حضرت امام حسینؑ، اہلِ بیتؑ اور بالخصوص حضرت علی اصغرؑ کی عظیم قربانیوں کو خراجِ عقیدت پیش کیا گیا، جبکہ انسانیت کی خدمت اور پیغامِ کربلا کو عام کرنے کے لیے تعبیرِ خواب لائبریری ماگام کی جانب سے سرینگر-گلمرگ شاہراہ پر عزاداروں، مسافروں اور عام راہگیروں کے لیے ایک خصوصی سبیل کا بھی اہتمام کیا گیا۔
مکمل تصاویر دیکھیں:
یومِ علی اصغرؑ عقیدت و احترام کے ساتھ منایا گیا، ماگام میں سبیل کا اہتمام
سبیل پر دن بھر ٹھنڈے پانی، شربت اور دیگر مشروبات کی تقسیم کا انتظام کیا گیا تھا تاکہ محرم الحرام کے مقدس ایام میں شہدائے کربلا کی پیاس اور قربانی کو یاد کرتے ہوئے لوگوں کی خدمت کی جا سکے۔ سبیل کا افتتاح معروف سیاسی و سماجی شخصیت شبیر احمد میر نے کیا اور باقاعدہ طور پر پانی کی تقسیم کا آغاز کیا۔ اس موقع پر معروف ریٹائرڈ ماہرِ تعلیم غلام حسن بابا، چیئرمین تعبیرِ خواب لائبریری غلام حسن ریشی، سماجی کارکنان، نوجوان رضاکاروں اور مقامی معززین کی ایک بڑی تعداد بھی موجود تھی۔
اس موقع پر خطاب کرتے ہوئے شبیر احمد میر نے کہا کہ محرم الحرام محض ایک تاریخی واقعے کی یاد نہیں بلکہ ایک عظیم فکری، روحانی اور اخلاقی تحریک کا نام ہے جو انسان کو حق، انصاف، قربانی اور خدمتِ خلق کا درس دیتی ہے۔ انہوں نے کہا کہ میدانِ کربلا میں حضرت امام حسینؑ اور ان کے باوفا ساتھیوں نے حق و صداقت کی سربلندی کے لیے جو قربانیاں پیش کیں، وہ رہتی دنیا تک انسانیت کے لیے مشعلِ راہ رہیں گی۔
انہوں نے کہا، ’’سبیل کا قیام دراصل شہدائے کربلا کی پیاس کی یاد تازہ کرنے اور ان کے عظیم پیغام کو نئی نسل تک پہنچانے کی ایک ادنیٰ سی کوشش ہے۔ لوگوں کو پانی پلانا ایک عظیم انسانی خدمت ہے اور یہ عمل ہمیں محبت، ہمدردی اور ایثار کا درس دیتا ہے۔‘‘
شبیر احمد میر نے مزید کہا کہ آج کے دور میں جب معاشرہ مختلف سماجی اور اخلاقی چیلنجز کا سامنا کر رہا ہے، پیغامِ کربلا ہمیں اتحاد، بھائی چارے، رواداری اور ظلم کے خلاف ڈٹ جانے کی تلقین کرتا ہے۔ انہوں نے نوجوانوں پر زور دیا کہ وہ امام حسینؑ کی تعلیمات کو اپنی عملی زندگی کا حصہ بنائیں اور معاشرے میں مثبت کردار ادا کریں۔
اس موقع پر خطاب کرتے ہوئے ریٹائرڈ ماہرِ تعلیم غلام حسن بابا نے کہا کہ محرم کا پیغام کسی ایک قوم، مسلک یا خطے تک محدود نہیں بلکہ پوری انسانیت کے لیے ہے۔ انہوں نے کہا کہ امام حسینؑ کی قربانی حق اور باطل کے درمیان ایک واضح لکیر کھینچتی ہے اور انسان کو اصولوں پر ثابت قدم رہنے کا حوصلہ عطا کرتی ہے۔
انہوں نے کہا، ’’آج دنیا کو سب سے زیادہ ضرورت امن، برداشت، اخلاقی جرات اور باہمی احترام کی ہے، اور یہ تمام اقدار ہمیں واقعۂ کربلا سے حاصل ہوتی ہیں۔ محرم ہمیں سکھاتا ہے کہ حق کا راستہ اگرچہ مشکل ہو سکتا ہے لیکن اس پر ثابت قدم رہنا ہی حقیقی کامیابی ہے۔‘‘
دریں اثنا بین الاقوامی حضرت علی اصغرؑ ڈے کے سلسلے میں ایک پُرعقیدت مجلس کا انعقاد بھی کیا گیا جس میں بڑی تعداد میں ماؤں نے اپنے شیر خوار بچوں کے ساتھ شرکت کی۔ مجلس میں حضرت علی اصغرؑ کی مظلومانہ شہادت کو یاد کرتے ہوئے آنکھیں اشکبار ہو گئیں اور شرکاء نے شہدائے کربلا کو بھرپور خراجِ عقیدت پیش کیا۔
مقررین نے اپنے خطابات میں کہا کہ حضرت علی اصغرؑ، جو امام حسینؑ کے چھ ماہ کے معصوم فرزند تھے، نے میدانِ کربلا میں اپنی جان کا نذرانہ پیش کرکے قربانی، صبر اور مظلومیت کی ایسی لازوال مثال قائم کی جس کی نظیر تاریخ میں کم ہی ملتی ہے۔ ان کی شہادت آج بھی انسانیت کے ضمیر کو جھنجھوڑتی ہے اور ظلم و جبر کے خلاف آواز بلند کرنے کا حوصلہ عطا کرتی ہے۔
انہوں نے کہا کہ یومِ علی اصغرؑ دراصل امام حسینؑ اور حضرت بی بی ربابؑ کے عظیم صبر، استقامت اور قربانی کو خراجِ عقیدت پیش کرنے کا دن ہے۔ یہ دن دنیا بھر کے انسانوں کو یاد دلاتا ہے کہ حق اور انصاف کے لیے دی جانے والی قربانیاں کبھی رائیگاں نہیں جاتیں۔
تقریب کے دوران بچوں نے بھی شہدائے کربلا کو خراجِ عقیدت پیش کیا۔ شرکاء نے حالیہ دنوں میں ایران میں شہید ہونے والے معصوم بچوں کو بھی یاد کیا اور ان کی تصاویر اپنے ہاتھوں میں اٹھا کر ان کے اہلِ خانہ کے ساتھ اظہارِ یکجہتی کیا۔ اس موقع پر شہید بچوں کے درجات کی بلندی، عالمِ اسلام کے اتحاد، امتِ مسلمہ کی سربلندی اور دنیا بھر میں امن و استحکام کے لیے خصوصی دعائیں کی گئیں۔
چیئرمین تعبیرِ خواب لائبریری غلام حسن ریشی نے اپنے خطاب میں کہا کہ حضرت علی اصغرؑ کی شہادت واقعۂ کربلا کا ایک انتہائی دردناک باب ہے جو آج بھی اہلِ دل کو غمزدہ کر دیتا ہے۔ انہوں نے کہا کہ حضرت علی اصغرؑ اپنی کم سنی کے باوجود صبر، قربانی، استقامت اور حق کی سربلندی کی ایک عظیم علامت ہیں۔
انہوں نے مزید کہا کہ پیغامِ کربلا آج بھی انسانیت کو امن، محبت، ہمدردی، رواداری، انصاف اور ظلم کے خلاف ڈٹ جانے کا درس دیتا ہے۔ انہوں نے کہا کہ ایسی تقریبات نئی نسل کو اسلامی تاریخ، اہلِ بیتؑ کی قربانیوں اور انسانی اقدار سے روشناس کرانے میں اہم کردار ادا کرتی ہیں۔
منتظمین کے مطابق دن بھر عزاداروں اور شاہراہ سے گزرنے والے مسافروں کے لیے ٹھنڈے پانی اور دیگر مشروبات کی فراہمی جاری رہی۔ مقامی لوگوں نے اس اقدام کو سراہتے ہوئے کہا کہ اس نوعیت کی فلاحی سرگرمیاں نہ صرف مذہبی اقدار کو فروغ دیتی ہیں بلکہ معاشرے میں خدمتِ خلق، بھائی چارے اور سماجی ہم آہنگی کے جذبے کو بھی مضبوط بناتی ہیں۔
تقریب کے اختتام پر شہدائے کربلا، شہدائے اسلام، عالمِ انسانیت کے امن، امتِ مسلمہ کے اتحاد اور جموں و کشمیر کی خوشحالی کے لیے خصوصی دعائیں کی گئیں، جبکہ شرکاء نے ’’لبیک یا حسینؑ‘‘ اور ’’لبیک یا علی اصغرؑ‘‘ کے نعروں کے ساتھ اپنے جذبات کا اظہار کیا۔
آپ کا تبصرہ